Valore di un centurione di Cesare

Versione di Plutarco: Valore di un centurione di Cesare, da 'Il nuovo Τάξις', di Vittorio Citti, Claudia Casali, Lorenzo Fort, Matteo Taufer.

Αὐτὸς δὲ κινεῖν τὴν φάλαγγα μέλλων καὶ προιὼν ἐπ᾿ἔργον ἤδη, πρῶτον ὁρᾷ τῶν ταξιάρχων ἄνδρα πιστὸν αὐτῷ καὶ πολέμων ἔμπειρον ἐπιθαρσύνοντα τοὺς ὑφ᾿αὑτῷ καὶ προκαλούμενον εἰς ἅμιλλαν ἀλκῆς. Τοῦτον ὀνομαστὶ προσαγορεύσας, 'Τί ἐλπίζομεν,' εἶπεν 'ὦ Γάιε Κράστινε, καὶ πῶς τι θάρσους ἔχομεν;'. Ὁ δὲ Κράστινος ἐκτείνας τὴν δεξιὰν καὶ μέγα βοήσας, 'Νικήσομεν' ἔφη 'λαμπρῶς, ὦ Καῖσαρ· ἐμὲ δ᾿ἢ ζῶντα τήμερον ἢ τεθνηκότα ἐπαινέσεις'. Ταῦτ᾿εἰπὼν πρῶτος ἐμβάλλει τοῖς πολεμίοις δρόμῳ, συνεπισπασάμενος τοὺς περὶ ἑαυτὸν ἑκατὸν καὶ εἴκοσι στρατιώτας. Διακόψας δὲ τοὺς πρώτους καὶ πρόσω χωρῶν φόνῳ πολλῷ καὶ βιαζόμενος ἀνακόπτεται ξίφει πληγεὶς διὰ τοῦ στόματος, ὥστε καὶ τὴν ἀκμὴν ὑπὲρ τὸ ἰνίον ἀνασχεῖν.