La pazienza di Matteo Visconti francesco petrarca

La pazienza di Matteo Visconti
fruges pagina 208 numero 309
Maffeus Vicecomes vir hac etate prudentissimus est habitus. Is Mediolano patria prepotentis inimici viribus pulsus , dum ad Canem Magnum veronensem , exulum atque inopum hospitalitate notissimum , confugisset , turbas hominum atque conspectum vitans procul a civitate solitarium , ut aiunt , sibi delegit habitaculum . Ubi cum brevi tempore deserti senis exilium ludibrio esse inciperet, quod fama loqueretur eum solum ac vagantem dies integros supra ripam Benaci lacus agere , superbus hostis unum ex suis ad eum ludendi gratia misisse traditur. Qui solivagum , ut audierat , prospiciens , aliquandiu contemplatus accessit et domini sui verbis quesivit primum quid illic solus ageret. Respondit senior : " Retia tendo ; solus ideo , ne quis obstrepat". Subsecutus nuntius : " Qui me " ,inquit , " huc dirigit , scire cupit ex te quibus viis aut quando speres in patriam reverti". Et ille : " Iisdem " , inquit , " quibus egressus sum ; sed non antequam flagitia sua sceleribus meis preponderare ceperint. Tunc me purgatum levioremque remeare , illum ponderibus suis descendere ac precipitem agi necesse est".
da Francesco Petrarca