da Ospite » 17 giu 2020, 13:46
Traditum est paulo ante Leuctricam pugnam Lacedaemone in Herculis fano arma sonuisse Herculisque simulacrum multo sudore manasse. At eodem tempore Thebis, ut ait Callisthenes, in templo Herculis valvae clausae repagulis subito se ipsae aperuerunt armaque, quae fixa in parietibus fuerant, ea sunt humi inventa. Cumque eodem tempore nuntiatum esset apud Lebadiam gallos galliaceos sic adsidue canere coepisse ut numquam intermitterent, tum Boeotii augures dixerunt victoriam Thebanorum futuram esse, propterea quod avis illa victa silere soleret, canere si vicisset. Eademque tempestate multis signis Lacedaemoniis Leuctricae pugnae calamitas denuntiabatur. Namque et in Lysandri, qui Lacedaemoniorum clarissimus fuerat, statua, quae Delphis stabat, in capite corona subito exstitit ex asperis herbis et agrestibus; stellaeque aureae, quae Delphis erant a Lacedaemoniis positae post navalem illam victoriam Lysandri qua Athenienses conciderunt, apud Aegos flumen, paulo ante Leuctricam pugnam deciderunt neque quisquam eas umquam repperit.
traduzione