Giovinezza di Attico Versione latino Cornelio Nepote

Pater Pomponii Attĭci mature decessit. Ipse adulescentŭlus propter adfinitatem P. Sulpicii, qui tribunus plebi interfectus est, non expers fuit illīus periculi. Namque Anicia, Pomponii consobrīna, nupserat Servio, fratri Sulpicii. Itaque interfecto Sulpicio, posteaquam vidit Cinnano tumultu civitatem esse perturbatam, cum alii Sullanis, alii Cinnanis favērent partibus, idoneum tempus ratus studiis obsequendi suis, Athenas se contulit. Neque eo setius adulescentem Marium hostem iudicatum iuvit opibus suis, cuius fugam pecuniā sublevavit. Ac ne illa peregrinatio detrimentum aliquod adferret rei familiari, eodem magnam partem fortunarum traiēcit suarum. Hic ita vixit, ut universis Atheniensibus merito esset carissimus. Nam praeter gratiam, quae iam in adulescentulo magna erat, saepe suis opibus inopiam eorum publicam levavit et universos frumento donavit, ita ut singulis sex modii tritici darentur. Hic autem sic se gerebat, ut communis infimis, par principibus videretur.