da Ospite » 15 dic 2017, 5:42
Latino a colori 1 pagina 393 numero 25
Erant apud Caesarem in equitum numero Allobroges duo fratres, Roucillus et Aecus, Adbucilli filii, qui principatum in civitate multis annis obtinuerat, singulari virtute homines, quorum opera Caesar omnibus Gallicis bellis optima fortissimaque erat usus. His domi ob has causas amplissimos magistratus mandaverat atque agros in Gallia ex hostibus captos praemiaque rei pecuniariae magna tribuerat locupletesque ex egentibus fecerat. Hi propter virtutem non solum apud Caesarem in honore erant, sed etiam apud exercitum cari habebantur; sed freti amicitia Caesaris despiciebant suos stipendiumque equitum fraudabant et praedam omnem domum avertebant. Illi universi Caesarem adierunt palamque de eorum iniuriis sunt questi. Caesar illos secreto castigavit monuitque ut ex sua amicitia omnia expectarent et ex praeteritis suis officiis reliqua sperarent. At illi discendere ab nobis et novum temptare fortunam novasque amicitias experiri constituerunt: nam ad Pompeium transierunt.